Sunday, February 17, 2008

تـــــاج بيقولي .. لــــو


السلام عليكم ورحمة الله وبركاته
ده تاني تاج ليــا مرسل من كل من :

أخى صاحب اللافتات المميزة .. وضـاح
أخى صاحب أوراق الــورد .. بهـــاء
أخى الغـــريب في بلاده .. عبد الرحمن

وبعتذر اليهم ثلاثتهم .. بتأخر إجابتى على هذا التاج
ولهم منى خالص تحيــاتي :)
يللا بقــى نسمع أسئــلة التاج بتقول إيــه .. ونشوف الــرد
اليكم الاسئلة :)


لومكنتش مصري بس عربي .. كانت هتبقى إيه نظرتك للمصريين واللي بيحصل في مصر دلوقتي؟

أولاً أنا فخورة جداً انى مصــرية وبحس ا ن دي نعمة كبيرة من ربنا
فكونى مصرية ده شئ يسعدنى والحمدلله :)
أما فى حالة كونى غير مصرية فأكيد وقتها بردوا كنت هبقى مبسوطة لان فكرة
الانتماء ) لا تتجزأ ولا تقتصر على كونى مصرية اولاء )
اما بخصوص نظريتى للمصرين :
بحس انهم شعب جامد وقوي جداً
قادر يعيش فى أسوأ الظروف واصعبها - يعنى اللى معاه جنيه عايش واللى معاه ألف عايش - وده اكتر ما يميزه
أحياناً بيكون فيهم نوع من السلبية لكن مش دائمةأما اللي بيحصل في مصر فأظن انه يطلق عليه ( شر البلية ما يضحك ..!!! ) مسرحية وفيها ممثلين كتير .. وغالبا الشعب يا بيكون كومبارس .. يا بيكون متفرج ومستني الستارة تتقفل !!!


لوكنت أوروبي أو غير مسلم بردو إيه نظرتك للعرب والمسلمين؟

سؤال له أكتر من احتمال يعنى فى حالة أن أكون .. أوروبي مســلم : نظرتــى للعرب والمسلمين مش هتختلف كتير عن كونى عربى مسلم
في اننا أمة اتظلمت وارتضت الظلم .. فى كثير من الاحيان ..
أكرمنا الله بأن نحمل دين رااائع ولابد من نشره بأحسن صورة ..
ونتيجة لذلك كنت سأحاول في مساعدة أي مظلوم ورفع الظلم عنه
وفي حالة أن أكون :
أوروبي غير مسلم : نظرتى للعرب والمسلمين كانت على أساس انهم أمة فى بقعة من بقاع الأرض ظلمت ولازالت ..

لوقالولك إنت بقيت رئيس جمهورية هتعمل إيه؟
وقتها هنافس هيلاري كلينتون على اللقب فى كونها أول رئيسة لأمريكا وانا أول رئيسة لمصر :D
أظن أول حاجة هو الحكم بالشريعة الاسلامية وأظن ان وقت ما ده هيحصل كل حاجة هتتظبط لوحدها ..
وعموماً مش هتكلم فى السؤال ده كتير وقتها هتشوفوا أفعال :)


لو كان ينفع ترجع طفل تاني وتخليك طفل علطول هترجع؟ وليه؟

امممممم
بصراحة لاء .. أظن إن اجمل شئ فى الدنيا ان احتفظ بالاتنين
انى احافظ على الطفلة اللى جوايا .. بكل احاسيسها ..
وفى نفس الوقت اكبر.. أقدر افكر.. واخد قرار .. اقدر اغير .. واعمل حاجة استفيد منها وأفيد فيها العالم كله
وأظن ان الاحتفاظ بالاتنين مش صعب .. لكن محتاج شوية متابعة واتزان :)


لو إنت طبيب وعندك مريض ميؤوس من حالته .. أيهما تفضل .. إنك تصارحه بالوضع وتقوله كل شيء بأمر الله في الاخر ولا تغرس فيه الامل لغاية لما يموت؟

طيب لو كنت طبيبة .. وانا افتخر بانى ها كون صيدلانية ان شاء الله ( رسمي ) كمان كام سنة :D
بس لو كنت طبيبة وعندي مريض ميؤوس من حالته فقوله الحقيقة طبعاً ولكن
بشكل انسانى وعقلانى .. ومينفعش اقولها بشكل انه يفقد الامل
اذا كان الطبيب لآخر لحظة مش بيفقد الامل لانه لو فقده مش هيعرف يعمل حاجة
وبالتالى وقتها لازم انقل الامل اللى جوايا للمريض وفى نفس الوقت يكون عارف حالته كويس


لوسمح لك برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟

جمله واحدة مش هينفع .. لانى عندى كلام كتير اوى لازم كله يتقال له :)
بس اذا كانت جملة واحدة - حاليا على ما نتقابل فى الجنة ان شاء الله - فستكون : بحبك ومحتاجلك

لوخطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟

هتستمر الحياة كما هى دون اى تغير :)
يعنى من الآخر .. هقبله زوج

لوطلعت القمر هتكتب إيه عليه؟
سبحانك ربى خلقت .. فأبدعت :)
واكيد هكتب اسمي - وامضى طبعاً :) - وهكتب التاريخ واليوم وممكن بردوا أكتب قد ايه انا فرحانه انى على القمر دلوقتى وهفضل احمد ربنا طول وقت الرحلة وانا رجعة ان شاء الله :D
- مش عارفة حسيت فعلاً انى طلعت القمر يللا مش بعيدة على ربنا :) -


لوكنا في عصر ازدهار الأندلس كنت تتخيل نفسك إزاي؟

عالمة فى الصيدلة :) وهتكون ليا مكتبة شاملة فى الصيدلة الخضراء
وعلى العموم حلم ممكن يتحقق دلوقتى ان شاء الله :)

لو انت مررت التاج ده لحد وما جاوبش عليه أعمل فيه إيه؟

أكيد عنده ظروف اومكسل :D
عموما لو واحدة صحبتى هغتت عليها لغاية ما ترد عليه
اما لو حد كنت اتمنى اسمع اجابته .. فالتمس له العذر

لو هتسافر في أي مكان في الدنيا تعيش فيه هتروح فين ؟

انا عموماً بحب السفر وبالتالى انا نفسى أسافر لبنان - ومحدش يستغرب - وتركيا
واعمل شوبنج فى دبى - وبردوا محدش يستغرب :D -
ونفسى أسافر لندن وكندا .. بس طبعا اعيش باستقرار كدا أكيد فى مصر

لو مررت التاج تمرره لمين ؟؟

مـــعاذ .. بيحب النــور

صـــوت بــلا صـــدى

صيــدلي .. مطحـــون

نسرين .. ورفرف يــاطير

ياسمين .. ومنتهــى اللمــاضة

23 comments:

Unknown said...

وعليكم السلام يادكتوره

:)

ياجماعه محدش يقول لنهي لو مش كنتي مصريه ..... نهي ينطبق عليها المثل لو لم اكن مصريا لوددت ان اكون منصوريا
_من المنصوره يعني _:)

نهي رشحي نفسك واختاري رمز الطير ونعمل شغل سوا
علي فكره عجبني قوووي انك هتوقعي علي القمر _ سعاتك فكراه دفتر من دفاتري اللي مليتيهم تواقيع_
ارحمي يانهي بقي

التاج حلو
واجابتك عاقله ;)
بس مش حلو انك تحدفيه عليا مش هي ده الصداقه
:)

عبدالرحمن الشافعي said...

السلام عليكم
التاج جميل ....والإجابات اجمل...تنم عن عقل راق
وإجابات متئنية....جزيتي خيرا...وشكلك كدة هتافسيني على الرئاسة...

تحياتي لكي

Mo3Az said...

اجابات عاقلة وجميلة ماشاء الله
انا كمان نفسى اوى اروح تركيا واقف عند مضيق البسفور واشوف القلعة اللى بناها محمد الفاتح :)

جميل التاج
:)

وان شاء الله اجاوب عليه فى اقرب وقت
(F)

Anonymous said...

من خوخة الى نهنوهه
سوسة طول عمرك وراسية يا حبيبتي
بس بقولك ايه اشمعنا يعني لبنا
تعالي انا وانتي روح فرنسا نعمل الشوبينج احسن برده
وموضوع دبي ده محلول انشاء الله هستضيفك هناك
وادي التلت نقط بتوعك
...

Anonymous said...

وأخيرا الدكتورة نهى جاوبت التاج
لو بعرف أغرط بس
أنا فكرت انك نسيتي أو ته في الطريق وما وصل
عموما ما شاء الله اجابات جميلة جدا
لو طلعتي على القمر لا تخربشي عليه كتير عشان يظل يضويلنا الطريق مش يعتم من كتر الحبر

وإن شاء الله يا رب تصيري عالمة صيدلة قد الدنيا
تحياتي:)

قضية عم أحمد Ahmed Case said...

ههههههههههههه
تسلم ايدك يا نهي اجاباتك كلها في الجون ..

الذكي يعرف من سؤاله والحكيم يعرف من جوابة ...

لو سمحتي اضيف مدونتك عندي ..

مستني ردك علشان اضيف

صاحب المضيفة said...

اجابات رايقة وحلوة

ربنا يسعدك ويهنيكي

noha said...

نسرين :

:D

ارشح نفسى واختار رمز الطير
:D
انتى مش هتطبلى الرشاوي دى

وبعدين دفاترك كان لها الشرف والفخر بوجود امضاتى فيها
ولو عندك راى تانى روحى اساليها :P

منورة يا نسرينا هانم :)



عبد الرحمــن :

وعليكم السلام ورحمة الله وبركاته
ربنا يكرمك ياارب على الكلام ده
وبخصوص المنافسة على الرئاسة فبعد اللى حصل لايمن نور
شكلى غيرت رأى :D
بس ممكن اصوت لك وده هيكون على حسب البرنامج الانتخابى

:D

لك تحياتى





مــعاذ :

ربنا يكرمك ياارب
تركيا فعلاً نفسى اروحها جداً ..
بحسها بلد راقية جداً
عموما لو روحتها قبلى
متنساش تصور لنا كل مكان عشان نتفرج بردوا

:)


مستنية اجابات حضرتك :)

noha said...

هوبـا :

فرنسا والله عندك حق
خلاص اتفقنا وناخد معانا نسرين
اهو بردوا حرام تقعد لوحدها

:p

وماشى يا هانم
يعنى انتى خلاص قررتى تقيمى فى دبى
;)

ماااشى

وبخصوص التلات نقط وربنا مستلفاهم :D
مش بتوعى ولا حاجة

noha said...

بـهاء :

:D

لاء متهش ولا حاجة وصل والله
وانا آسفة بجد على التأخير

بس الظروف والكسل هنعمل ايه :D

ربنا يكرمك يااارب وعود حميد ونورت :)





أحمد رفـعت :

ربنا يكرمك ياارب
:)

سعيدة بتعلقيك .. وليا الشرف انى مدونة تبقى واحدة من اللى عند عم أحمد
:):)

noha said...

صاحب المضيفة :

ربنا يكرمك يااارب
:)
وسعيدة بمتابعتك



كفاية طيبة :

:)

آخر العنقود said...

بجد اجابات جميلة
وعجبتنى وواضح انها متجاوبة بروقااااااااااان جامد
ماشاء الله عليكى يادكتورة
واحييكى على انتمائك الجميل ده
وياريت تبقى تعرفينى وانتى راحة تعملى شوبينج
ممكن اشاور نفسى
:)
:)

سلام يادكتورة

عبد الرحمن مدني said...

من كان يؤمن بالله و اليوم الاخر فليزور مدونه
اخوان ستايل ويفرج عن كرب اخوكم المسلم

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته

تاج رائع واجابات موفقة جداً

والله المستعان

كفايـة طيبـة said...

momken atlob talab ??

momken tekteby khawatrek 7awaleen safarek tany zay zaman ??

bgd wa7ashetny khawatrek awy ya noha

waiting for u

(احمد سكر ) said...

ماشاء الله عليكى وعلى اجاباتك

ربنا يحفظك يادكتورة المستقبل

تحيااتى
احمد سكر

3abdo me7tas said...

كده من أولها أدخل المدونة ألاقى تاج
أحسن حاجه من التاجات دى بجد ان انت تقدر تعرف اللى قدامك من كل كلمة بيقولها
ربنا يكرمك يا رب

انكسارات .. احمد البوهى said...

تعلقى الاول .. ولكنها لم تكن زيارتى الاولى بالطبع واظننى متابع جيد لمدونتك
ـــــــ
اما اجاباتك فانها تنم عن مزيج ما بين طموح الدنيا وابتغاء جنة الاخرة دارا وموعدا
اكرمك اللى ووفقك لما فيه رضاه
ــــــ
تحياتى

ساعد نسرين الايمن said...

دكتورة / نهي

بعد اذن سموك يا فندم
تمت اضافة مدونتك الجميلة عندنا

تقبلي تحياتي
وسلامي لصديقتك الانتيم
نسرين

noha said...

آخر العنقود :

ربنا يكرمك يااارب
وفعلاً هى من جهة متجاوبة بروقاان فهى متجاوبة بروقااان

:D
ودونت ورروى لما هطلع اعمل شوبنج هقولك
شكلنا كدا هناخد اتوبيس
:D

ربنا يعزك ياحبيبتى
:)



الجمعاوي الاصيل :

وعليكم السلام ورحمة الله وبركاته

ربنا يكرمك يارب
وسعيدة بمتابعتك وتعليقك

:)

noha said...

كفاية طيبة :

لبيت طلبك خلاص
اصل مقدرتش ما انفذوش
خلى بالك من نفسك يا مومو هانم

:D


احمد سكر :

ربنا يكرمك يا فندم
:)



3abdo me7tas :

فعلاً انا بردوا بحس ان اكتر وسيلة ممكن تفهمك اللى قدامك هو التاج

:)


سعيدة بزيارتك الاولى واتمنى تكررها تانى

noha said...

انكسارات :

:)

لاء يا فندم مش التعليق الاول ..
انا سعيدة جدا بمتابعة حضرتك

:)



ساعد نسرين الايمن :

ربنا يكرمك يافندم
:)
وسعيدة بتعليقك الاول عندى

Anonymous said...

滿.......................................................